Vínklúbbur fyrir þau sem hafa áhuga á víni

Spaghetti Cacio E Pepe

Marta Rún ritar

Ertu ekki að grínast hvað þetta er gott pasta? Ég er alveg búin að skipta Carbonara út fyrir þessa uppskrift. Þetta er minn go to réttur þegar það er lítið til í ísskápnum og tekur enga stund að gera. Ég skil ekkert í mér að hafa ekki deilt þessum rétti á FEMME fyrr. Cacio e Pepe er klassískur ítalskur réttur og þýðir hreinlega ostur og pipar.

Uppskriftin er eftir uppáhaldið mitt Chrissy Teigan úr matreiðslubókinni hennar Cravings sem ég mæli mikið með, fullt af frábærum uppskriftum og húmor.
Klassískt cacio e pepe er bara með parmesan og svörtum pipar en í hennar uppskrift bætir hún nokkrum hráefnum við sem gerir þetta fyrir mitt leyti betra.

Uppskriftin er fyrir 4

Hráefni 

400 g spagettí
Olífu olía
1 pakki beikon
4 hvítlauksgeirar
1 teskeið chiliflögur
1 teskeið ferskur svartur pipar
Safi út 1/2 sítrónu+smá börkur
1 og 1/2 bolli rifinn parmesan
3-4 lúkur klettasalat

Aðferð

Byrjið á því að sjóða spagettí í saltvatni eftir leiðbeiningum fyrir al dente en þegar þú bítur í það og það er ennþá pínu stökkt sem er oftast um 1-2 mínútur minna en pakkinn segir til. Mikilvægt er að geyma eins og 1 bolla af pastavatninu áður en þið sigtið vatnið frá.

Finnið til stóra pönnu og steikið beikonbitana þangað til þeir eru orðið stökkir og brúnir, eða um það bil 7-9 mínútur. Bætið við ólífuolíu á pönnuna ásamt hvítlauknum, chilliflögunum, og svörtum pipar og hitaðu saman í rúma 1 mínútu.

Bætið við safanum úr sítrónunum og hellið síðan pastanu yfir á pönnuna og blandið öllu saman. Setjið parmesanostinn yfir í nokkrum skrefum og hrærðu ásamt nokkrum matskeiðum af pastavatninu sem þú geymdir með.
Það hjálpar til með að fá parmesanostinn til að festast betur við pastað.
Bætið við klettasalatinu í restina og blandið saman.
Saltið og piprið meira eftir smekk.
Berið fram með meira af parmesan og chilliflögum fyrir þá sem vilja.

Með þessum frábæra pasta rétti mælir Vinó með:

Muga Blanco

Víngarðurinn segir;

Síðast fékk ég árganginn 2014 til umfjöllunar (****) og ekki er ég frá því að árgangurinn 2015 sé bæði fínlegri og betri, en þetta er auðvitað smekksatriði. 2014 var eftilvill stærri, mýkri og feitari en ég kann betur við þennan jarðbundnari og steinefnaríkari stíl. Það er sem fyrr aðallega úr þrúgunni Viura (90%) og afgangurinn er Malvasia og það er gerjað í eikartunnum í stíl við Búrgúndarhvítvín. Það er ljós-gullið að lit með ferska, meðalopna angan af sætum sítrus, peru, steinaávöxtum, rykugum steinefnum, austurlenskum ávöxtum og dálítið sviðinni eik. Það er sýruríkt og ferskt í munni, mjúkt og kremað með keim af eplaböku, sætum sítrus, steinaávöxtum, kryddgrösum, rauðu greipaldin, peru og reyktum tónum úr eikinni. Það endist vel og er skrefinu nær Búrgúnd en árgangurinn 2014. Fínlegt en margslungið og er afar vel byggt.

Mjög gott matarvín sem er fínt með hverskyns bragðmeiri forréttum, feitari og bragðmeiri fiskréttum og ljósu kjöti líka. Verð kr. 2.799.- Frábær kaup.

Share Post