Rjúpur og tilheyrandi
Fyrir 2-3
Rjúpusoð uppskrift
Hráefni
½ laukur
30 g smjör
2-3 læri, fóarn og hjörtu
1 tsk. salt
600 ml vatn
Aðferð
Steikið laukinn upp úr smjörinu og saltið.
Steikið kjötið með lauknum þar til það brúnast og hellið þá vatninu yfir og leyfið að sjóða í um 1 ½ klukkustund (lengur ef þið viljið meira bragð).
Sigtið síðan allt gumsið frá og notið soðið í sósuna.
Rjúpusósa uppskrift
Hráefni
80g smjör
2 msk. hveiti
Rjúpusoðið hér að ofan
300 ml rjómi
3 tsk. Oscar Vildt kraftur
2 tsk. bláberjasulta
2 tsk. gráðaostur
3 msk. Muga rauðvín
Salt og pipar eftir smekk
Aðferð
Bræðið smjörið í potti, pískið hveitið saman við og hellið næst soðinu yfir og pískið vel saman allan tímann.
Bætið þá rjómanum og öðrum hráefnum saman við, smakkið til með krafti og kryddum og leyfið að malla aðeins.
Rjúpur eldun
Hráefni
8 rjúpubringur
Smjör til steikingar
Salt og pipar
6 x ½ niðursoðnar perur í dós
Rifsberjasulta
Aðferð
Hitið ofninn í 190°C.
Snöggsteikið bringurnar upp úr vel af smjöri í rúmlega hálfa mínútu á hvorri hlið.
Raðið í eldfast mót og hellið sósu upp á miðjar bringur (berið restina af sósunni fram með máltíðinni).
Bakið í 10-13 mínútur eftir stærð.
Þegar fatið er tekið úr ofninum má raða perunum í kring og setja rifsberjasultu ofan í „holuna“.
Njótið með rauðbeðusalati og brúnuðum kartöflum.
Rauðbeðusalat uppskrift
Hráefni
3 gul epli (flysjuð og skorin smátt)
Um 250 g rauðbeður (skornar smátt niður)
3 msk. rifsberjahlaup, brætt í örbylgjuofni/potti svo úr verði saft
300 ml þeyttur rjómi
Aðferð
Blandið rifsberjahlaupinu saman við söxuð epli og rauðbeður með sleikju.
Blandið næst þeytta rjómanum saman við og berið fram.
Brúnaðar kartöflur
Hráefni
Um 900 g soðnar kartöflur
150 g sykur
30 g smjör
1 msk. rjómi
Aðferð
Setjið sykurinn á pönnu á háan hita.
Þegar hann byrjar að leysast upp þarf að lækka hitann, setja smjörið saman við og hræra vel saman.
Næst má setja rjómann saman við og leyfa blöndunni aðeins að „bubbla“ og hella kartöflunum á pönnuna og velta upp úr karamellunni.
