Marineraðar kjúklingabringur með villisveppasósu og heimalöguðu hrásalati
Hráefni
Kjúklingabringur, 2 stk sirka 180-200 g hver
Bezt á kjúklinginn, 1,5-2 msk
Rjómi, 250 ml
Villisveppaostur, 50 g
Provance krydd, 0,5 tsk
Kjúklingakraftur, 1 tsk / Oscar
Sósulitur, 1 tsk / Má sleppa
Rauðkál, 150 g
Gulrót, 60 g
Japanskt majónes, 1 msk
Sýrður rjómi 10%, 1 msk
Eplaedik, 1 tsk
Steinselja, 8 g
Kasjúhnetur, 25 g
Krullufranskar
Aðferð
Setjið kjúklingabringurnar á milli tveggja laga af bökunarpappír og berjið með potti eða lítilli pönnu þar til þær eru jafnar að þykkt. Setjið í skál með olíu og kryddblöndu. Blandið vel saman og látið marinerast a.m.k. í klukkutíma.
Setjið rjóma, provance krydd og kjúklingakraft í lítinn pott og stillið á miðlungshita. Rífið villisveppaost út í með fínu rifjárni og látið bráðna saman við í rólegheitum. Hrærið í við og við og látið malla þar til sósan er hæfileg að þykkt. Smakkið til með salti og notið sósulit ef vill.
Hitið olíu á pönnu við meðalháan hita. Steikið bringurnar í 2-2,5 mín á hvorri hlið. Fylgist með hitanum svo kryddblandan brenni ekki við. Færið bringurnar í eldfast mót og hellið olíunni úr pönnunni yfir þær. Bakið í miðjum ofni í 15 mín eða þar til kjúklingurinn er hvítur í gegn og fulleldaður.
Sneiðið rauðkál mjög þunnt, helst með mandolíni (farið varlega!). Skrælið og rífið gulrót með rifjárni. Hrærið saman majónes, sýrðan rjóma og eplaedik. Blandið dressingunni saman við rauðkálið og gulrótina. Saxið steinselju og blandið saman við salatið ásamt kasjúhnetum. Smakkið til með salti.
Berið fram með t.d. krullufrönskum.
