Vínklúbbur fyrir þau sem hafa áhuga á víni


Steikarsalat með gráðosti og hunangsgljáðum perum

Marta Rún ritar:

Hráefni:

400g nautasteik
1 msk ólífuolía
Salt og pipar
2 msk smjör
2 msk hunang eða púðursykur
2 perur skornar í miðlungs munnbita
¾ bolli pecan hnetur
100 g gráðostur (ég notaði Gorgonzola, ef þú ert ekki fyrir gráðost getur þú notað camembert)
1 poki klettasalat

Salatdressing:

1 msk Dijon sinnep
1 msk rauðvínsedik
½ tsk hunang
1/3 bolli ólífuolía
salt og pipar
Öllum hráefnum er blandað vel saman í skál.

Aðferð:

  1. Takið nautakjötið út úr ísskápnum, saltið og leyfið kjötinu að ná stofuhita.

  2. Hitið pönnu á miðlungshita, bætið olíu á pönnuna og þegar hún er farin að hitna aðeins
    skellið þá steikinni á pönnuna og eldið hana á hvorri hlið í 4-5 mínútur.
    Ef þið viljið hafa steikina medium þá bætið þið 5 mínútum við steikingartímann.
    Leggið steikina svo á disk og leyfið henni að hvílast í 10 mínútur.

  3. Bræðið smjör á pönnu og bætið púðursykri við og leyfið honum að leysast upp.
    Bætið þá perubitunum útá pönnuna og steikið þær þangað til að þær eru farnar að mýkjast.
    Takið perurnar af pönnunni og bætið hnetunum út á pönnuna og ristið í 2 mínútur.

  4. Skerið steikina niður í þunnar sneiðar. Dreifið klettasalati yfir salatskálina eða diskinn sem þið ætlið að bera salatið fram í.
    Raðið steikarsneiðunum yfir, bætið perunum, hnetunum og gráðostinum ofan á.
    Hellið smá salat dressingu yfir og berið restina af henni fram með salatinu.

Með þessum rétt mælir Vínó með Ramon Roqueta Garnacha

Vínótek segir;

Einhver bestu kaupin í hilllum vínbúðana undanfarin ár hefur verið Ramon Roqueta Reservan sem er blandað úr Tempranillo og Cabernet Sauvignon og svo því sé haldið til haga þá fékk árgangurinn 2010 þrjár og hálfa stjörnu hérna í Víngarðinum á sínum tíma, en árgangarnir 2012, 2013 og 2014 allir fjórar stjörnur.  Sé það tekið með í reikninginn að vínið er undir tvöþúsund krónum þá hljóta það að teljast ein öruggustu og bestu kaupin á Íslandi.

Þetta vín er hinsvegar lagað úr þrúgunni Garnacha (sama þrúga og hin franska Grenache) og kemur frá Katalóníu, rétt einsog hin vínin frá Ramon Roqueta.  Það hefur meðaldjúpan, kirsuberjarauðan lit og ríflega meðalopna angan sem er afar dæmigerð fyrir Garnacha; kirsuber, hindber og jarðarber, fylltur lakkrís og Mon Chéri-molar í bland við létt-reykta viðar- eða jarðartóna.  Það er rétt ríflega meðalbragðmikið í munni með fína sýru og sætan og svolítið alkóhólríkan grunn.  Þarna eru kirsuber, hindber, Mon Chéri-molar, lakkrískonfekt, karamella og kryddgrös.  Fínasta hversdagsvín en auðvitað ekkert tiltakanlega fínlegt, þrúgan og aldurinn bera það einhvernvegin með sér, en er prýðlegt með allskonar bragðmeiri hversdagsmat, pottréttum, pasta, grilli og pítsum.

Verð kr. 1.899.- Mjög góð kaup.

Share Post