Lasagna með Béchamel sósu
Lasagna kemur frá Emilia-Romagna-héraði á Ítalíu og er ákaflega vinsæll réttur á mörgum íslenskum heimilum. Lasagna er líka kjörinn þægindaréttur til að bjóða uppá í matarboðinu þar sem auðvelt er að gera hann fyrir fram og nær öruggt að gestir verði sáttir.
Fyrir 4
Hráefni fyrir kjötsósuna
45 ml Extra virgin ólívu olía
25 g smjör
1 x laukur, fínt skorinn
1 x sellerí, fínt skorið
1 x gulrót, fínt skorin
150 g beikon, smátt skorið
200 g svínahakk
200 g nautahakk
200 ml rauðvín
2 msk. tómatpúrra
200 ml grænmetissoð
4 x Lasagna plötur – ferskar eða þurrar
Aðferð fyrir kjötsósuna
- Hitið smjörið og olíuna saman á pönnu og bætið lauk, sellerí, gulrót og beikoni út á pönnuna og steikið við vægan hita í 10 mínútur.
- Bætið hakkinu út á pönnuna og steikið þar til kjötið hefur tekið á sig lit.
- Hækkið hitann undir pönnunni og bætið rauðvíninu út í og látið það gufa upp.
- Bætið tómatpúrru og hluta af grænmetissoði saman við.
- Lækkið hitann, setið lok yfir pönnuna og látið malla saman í góðan tíma, allt upp í 2 klst.
- Mikilvægt að bæta grænmetissoði út í við og við og gæta þess að sósan þorni ekki upp.
Hráefni fyrir Béchamel-sósuna
40 g smjör
40 g hveiti
500 ml mjólk
100 g rifinn parmesan ostur
Aðferð
- Nú þegar kjötsósan hefur fengið að sjóða á vægum hita í góðan tíma er kominn tími á að forhita ofninn í 200°C og útbúa Béchamel-sósuna.
- Bræðið smjör á meðal háum hita á pönnu, takið pönnuna af hitanum og hrærið hveiti saman við og smá mjólk.
- Setjið pönnuna undir hitann aftur og bætið mjólkinni saman við og hrærið í af og til.
- Látið sósuna malla á vægum hita í 3 til 4 mínútur þangað til að hún byrjar að þykkna.
- Takið pönnuna af hitanum, kryddið sósuna með salti og pipar og bætið meiri hlutanum af parmesan ostinum út í og hrærið saman. Skiljið parmesan ost eftir til að setja á milli laga.
- Finnið til eldfast mót. Byrjið á því að setja þunnt lag af kjötsósu í botninn á fatinu, leggið svo lasagna plötu yfir, kjötsósu aftur ofan á lasagna plötuna og þar næst Béchamel sósu og smá parmesan ost yfir og svo endurtaka ferlið þangað til að öll hráefnin eru búin.
- Endið á því að setja Béchamel sósu og rifinn parmesan ost yfir og bakið í ofni í 30 mínútur.