Vínklúbbur fyrir þau sem hafa áhuga á víni

þakkagjörðaveisla

Marta Rún frá Femme.is ritar

Ég var á Íslandi í eina viku og ég ákvað að nýta þann tíma og henda í matarboð fyrir vini og fjölskyldu.
Ég hef síðustu 2 ár gert kalkún í tilefni þakkargjörðarhátíðarinnar en núna verð ég ekki á Íslandi þannig ég ákvað að gera það vikuna fyrir.
En það er gott fyrir ykkur kæru lesendur því þá geti þið fengið uppskriftir af öllu fyrir þakkargjörðahátíðina eða nýtt ykkur þessa uppskrift fyrir komandi hátíðir.

Ég var tvær þakkargjörðarhátíðir í Bandaríkjunum og ég hélt í hefðina eftir að ég flutti heim.
Mér finnst þetta skemmtileg hefð til að halda og þá sérstaklega svona í myrkrinu í nóvember.
Í fyrra gerði ég grein sem er mjög svipað þessari og með myndböndum þar sem ég lærði aðferðirnar.
Svona smá forskot tekið á hátíðarmáltíðarnar og leið til að koma fólki saman og borða góðan mat.
Ég bauð Söru Dögg um að koma og hjálpa mér að skreyta borðið fyrir myndatöku þar sem kalkúnninn og allt meðlætið myndi aldrei komast fyrir.
Við notuðum allt sem var til og þetta kom vel út.
Enda er Sara Dögg einn mesti fagurkeri sem ég veit um.

Skreyttar vínflöskur á borðinu er mjög góð humynd og gerir mikið.

_______________

Ég var með 8kg kalkún sem dugði fyrir 12 manns og meira til.
Það er gott að miða við þessa töflu:

3 kg er ætlað 6-7 manns
4 kg er ætlað 8-10 manns
5 kg er ætlað 10-12 manns
6 kg er ætlað 12-14 manns
7 kg er ætlað 14-16 manns
8 kg er ætlað 16-18 manns

Kalkúnninn og Smjörið

500 g smjör (látið standa í stofuhita)
Salt og pipar
Ólífuolía
2 Sítrónur
3 Hvítlauksgeirar
1 lúka söxuð steinselja
2 lárviðarlauf

Setjið smjörið í skál og saltið og piprið vel.
Hellið síðan smá ólífuolíu yfir því það kemur í veg fyrir að smjörið brenni.
Rífið börkinn af tveimur sítrónum í smjörið og kreistið síðan safann úr þeim.
Pressið 3 hvítlauksgeira og saxiði lúku af steinselju og hrærið saman.

Síðan er tími til að verða skítugur í eldhúsinu.
Þið losið húðina frá bringunum og þar í kring með því að fara með hendurnar inn á milli og losa um. Passið bara að rífa ekki gat.
Síðan hnoðiði smjörið í kúlur sem passa í hendurnar, farið með þær inn í kjúklinginn undir húðina og dreifið út um allt og þetta gerið þið báðum megin,

Makið smjörinu einnig yfir kalkúninn og hellið smá olíu líka yfir hann svo smjörið brenni ekki.

Settu tvo heila lauka sem þú skerð í 4 bita, 2 lárviðarlauf og 1 sítrónu skorna í helming inní kalkúninn.
Það gefur honum aukabragð og þú notar það síðan til að búa til sósuna.

Raðaðu svo einum pakka af beikoni yfir bringurnar á  kalkúninn.

Ofninn er settur í hæsta hita og svo þegar þú setur kalkúninn inn lækkaru niður í 180°. Tíminn sem fuglinn er inni er u.þ.b. 30-40 mín fyrir hvert kíló.
Tvisvar sinnum tók ég ausu og hellti soðinu sem var búið að myndast yfir hann.
“Aðaltrixið” er svo að láta hann standa í tvo tíma eða lengur.
Þá lokast hann og allur safinn helst inn í kjötinu og þú hefur tíma til að setja allt meðlætið inní ofn og leggja á borð.
Til að vera viss um að hann sé tilbúinn getur þú skorið í hann og athugað hvort að safinn sé glær. Einnig er auðvitað hægt að setja kjöthitamæli í hann og athuga hvort hann sé ekki 74°C í bringunni.

Sósan

Inn í kalkúni er alltaf poki með hálsinum og fleira aukakjöti. Það sauð ég með líter af vatni, sellerí og lauk. Þannig bjó ég til soð sem ég notaði í sósuna og mæðlætið.
(Ef það er ekki þá getur þú notað kjúklingateninga)

Byrjaðu á því að hella soðinu sem var í bakkanum sem kalkúninn var eldaður í í skál.
Finndu til góða pönnu eða pott.
Taktu laukinn og sítrónuna sem þú settir inn í kalkúninn og skerðu niður og settu á pönnuna.
Taktu síðan beikonið af kalkúninum, skerðu það niður og settu einnig á pönnuna.

Settu tvær rósmarín stangir ofan í pottinn.
Skerðu tvo tómata í bita og steiktu allt saman. Tómatarnir hjalpa til við að þykkja sósuna og gefa gott aukabragð.
Helltu síðan einum epla cider í (ég notaði Somersby) og eina ausu úr kraftinum sem var í kalkúnafatinu.
Láttu svo malla saman þangað til sósan hefur minnkað um helming.
Þá ferðu í að kreista allt saman, ef þú átt kartöflustappara getur þú notað hann annars bara endann á ausunni þinni. Kreistu allt vel til að fá sem mesta bragðið.
Svo helliru 2 bollum af kalkúna- eða kjúklingasoðinu þínu.
Svo sigtaru sósuna í pott og pressar vel úr sigtinu til að fá mesta bragðið.

Þá ætti sósan þín að vera tilbúin og ef hún er gerð rétt þá ætti hún að vera alveg hrikalega góð!

Fylling

1/2 Pakki sveppir
1 Laukur
1 Poki heimilisbrauð
1 Sellerístöng
1/2 Bolli valhnetur
1/2 Pakki þurkaðar aprikósur (líka hægt að nota þurkuð trönuber)
1 Pakki beikon
1 Bolli kalkúnakraftur
1 tsk Lyftiduft
Salt og pipar

Byrjaðu á að rista brauðsneiðarnar og skera þær í litla teninga og henda þeim í stóra skál. Því næst steikiru beikonið vel á pönnu og bætir í skálina.
Steiktu síðan laukinn og selleríið á sömu pönnu og beikonið í 5-10 mínútur. Bættu við sveppunum á pönnuna og steiktu í ca. 10 mínútur í viðbót. Bættu þessu í stóru skálina með brauðmolunum og beikoninu ásamt eggjum, lyftidufti og kalkúnasoðinu. Þessu er öllu blandað vel saman með skeið og sett í eldfast mót þar og svo bakað á 180°C í ca. 20 mínútur.

Cheese green bean casserole

2x pokar frosnar stangabaunir
1 laukur
1/2 bolli laukur
1 pakki sveppir (smátt saxaðir)
2 hvítlauksgeirar
1 tsk hveiti
3/4 bolli kjúklinga/grænmetiskraftur
300 ml matreiðslurjómi
Rifinn ostur
1/2 bolli steiktur laukur
salt&pipar

Byrjið á að afþýða stangabaunirnar.
Bræðið smjörið á frekar stórri pönnu og steikið laukinn, hvítlaukinn og sveppina á miðlungshita í 5-6 mínútur eða þangað til sveppirnir eru orðnir mjúkir, saltið og piprið. Stráið hveiti yfir og hrærið saman. Bætið kraftinum út í og látið malla í 3 mínútur. Bætið þá við rjómanum og látið allt malla saman í svona 10 mínútur eða þar til sósan er orðin þykk.
Bætið baununum út á pönnuna og blandið öllu saman.
Setjið í eldfast mót og dreifið rifnum osti yfir og steiktum lauk. Ég notaði Cheddar ost, hann er bragðmikill og góður í þetta.
Setjið inn í ofn á 180° í 10 mín.

Sætkartöflumús

4-5 sætar kartöflur

3/4 Bolli púðursykur

1/2 Bolli bráðnað smjör

2 tsk Salt

1/2 tsk Vanilludropar

1  Bolli pekanhnetur smátt skornar

Sykurpúðar eftir smekk.

Ég byrjaði á að setja kartöflubitana í pott að fylla hann að vatni þar til það nær yfir kartöflunar. Síðan stillti ég á háan hita og lét þá sjóða með lokinu á þar til þeir voru orðnir mjúkir og fínir. Þá er vatnið sigtað frá og þeim leyft að kólna örlítið, því næst eru bitarnir stappaðir með kartöflustappara eða gaffli.

Stappan er sett í stóra skál og púðursykri, smjöri salti, vanilludropum og helming af pekanhnetunum blandað vel saman við. Mixið er sett í eldfast mót og restinni af pekanhnetunum stráð jafnt yfir og sykurpúðunum ofan á þær. Mótið er svo sett inn í ofn þar til sykurpúðarnir eru bráðnaðir og örlítið gylltir.

Rósakál

Ég skar rósakálið bara til helminga og setti í eldfast mót með salti, pipar, olíu og 2 kreistum hvítlauksgeirum.
Síðan inn í ofn á 180° í 45 mín.


_____________________

Því næst var það bara að setjast niður og njóta.
Ég get sagt ykkur það að eftir heilan dag að dunda mér í eldhúsinu þá var þetta alveg þess virði.

Ég vona að þessar uppskriftir eigi eftir að nýtast einhverjum.

Þessi grein er fengin með góðfúslegu leyfi frá Mörtu Rún á Femme.is

Share Post