Vínklúbbur fyrir þau sem hafa áhuga á víni

Milenese kjúklingur fylltur með mozzarella

Marta Rún ritar:

Þessi uppskrift er úr nýjustu matreiðslubók Chrissy Teigan og er hún mjög cheesy og góð! Þetta er í raun og veru eins og stökkur mozzarella-sticks kjúklingur, þarf að selja þetta eitthvað betur? Ég mæli mikið með að prófa þessa uppskrift.

Uppskrift fyrir: 4
Hráefni

  • 4 kjúklingabringur
  • 1 tsk cayenne pipar
  • Salt & pipar
  • 100 g hveiti
  • 4 egg
  • 100g rasp
  • 1 mozzarella kúla
  • Olía
  • 1 poki klettasalat
  • kirsuberjatómatar
  • parmesan
  • olía
  • Balsamik edik

Aðferð:
Hitið ofninn á 160°. Leggið plastfilmu ofan á bretti og kjúklingabringurnar svo ofan á, setjið einnig plastfilmu ofan á. Notið kjöthamar eða tóma vínflösku til þess að berja bringurnar niður í jafn þunnar sneiðar. Passið bara að berja þær ekki of fast þannig að þær rifni. Saltið og piprið bringurnar og kryddið með smá cayenne pipar.

Finnið til 3 djúpa diska. Setjið hveiti í eina skálina ásamt salti, pipar og cayenne. Eggin í aðra skálina með smá salti og hrærið saman. Setjið síðan raspið í síðustu skálina með smá salti og pipar.

Rífið mozzarella ostinn í litla bita og skiptið í fjóra skammta. Raðið einum hlutanum í miðja bringu, notið fingurgómana og bleytið endana á kjúklingunum með vatni og stráið síðan smá hveiti yfir og lokið bringunni.

Takið síðan lokuðu bringurnar og veltið upp úr hveiti, þaðan í eggin og að lokum uppúr raspinu. Hitið upp pönnu á háum hita með 2 cm af olíu. Steikið báðar hliðar í 2-3 mínútur eða þar til þær verða orðnar fallega gullbrúnar. Setjið þær á ofnplötu með smjörpappír og klárið að elda í ofninum í 15 mínútur.

Finnið til stóran disk og setjið klettasalat og tómata á disk og stráið ólífuolíu og balsamikediki yfir. Skerið síðan kjúklinginn í sneiðar og raðið á diskinn og stráið parmesan yfir.

Voila !

Með þessum rétt mælir Vínó með Cune Reserva 2013

Cune Reserva 2013

Kirsuberjarautt. Meðalfylling, ósætt, fersk sýra, miðlungstannín. Rauð ber, kirsuber, laufkrydd, tunna.

Land: Spánn
Framleiðandi: CVNE
Áfengismagn: 13,5%
Verð:2699 kr.
Korktappi
Share Post