Vínklúbbur fyrir þau sem hafa áhuga á víni

Miðjarðarhafskjúklingaréttur á pönnu

Marta Rún ritar:

Kjúklingaréttur á pönnu með hráefnum frá miðjarðarhafinu. Ótrúlega þægilegt að gera allan réttinn á einni pönnu og bera fram. Í þessum rétti eru ekki mörg hráefni en fersk og góð sem vinna vel saman. Það skemmir líka ekki fyrir hvað hann er litríkur og fallegur.

Hráefni

  • 4 kjúklingabringur
  • 2 msk rifinn hvítlaukur
  • Salt og pipar
  • 1 msk þurrkað oregano
  • ½ fl þurrt hvítvín
  • 1 sítróna
  • ½ bolli kjúklingasoð (1/2 teningur og heitt vatn)
  • 1 smátt saxaður rauðlaukur
  • 4 smátt skornir tómatar
  • 4 msk grænar ólífur í sneiðum
  • Handfylli af ferskri steinselju
  • ½ fetakubbur

Aðferð:

  1. Byrjið á því að skera nokkra djúpa skurði í kjúklingabringurnar án þess að skera þær í sundur.
  2. Setjið kjúklinginn í skál með hvítlauknum, olíu, safa af ½ sítrónu, oregano, 1 msk steinselju, salti og pipar og leyfið því að marinerast í að minnsta kosti klukkutíma.
  3. Finnið til stóra pönnu, hitið olíuna á miðlungsháum hita. Steikið kjúklinginn á báðum hliðum þangað til hann hefur fengið gullbrúnan lit. Bætið hvítvíninu við og leyfið því að sjóða til helmings. Bætið þá sítrónusafanum og kjúklingakraftinum út í og sjóðið saman aftur til helmings. Setjið lok á pönnuna eða álpappír og látið malla saman í 10-15 mínútur ásamt því að snúa kjúklingum við einu sinni á pönnunni.
  4. Lækkið vel undir þegar kjúklingurinn er tilbúinn. Dreifið tómötunum, rauðlauknum og ólífunum yfir kjúklinginn og lokið í aðrar 3 mínútur rétt til að hita. Stráið steinselju og rifinn fetaost yfir réttinn ásamt svörtum pipar.

 

Gott er að bera réttinn fram með pasta, grjónum, salati eða kúskús ásamt hvítvíninu sem þú notaðir í réttinn.

 

Með þessum rétt mælir Vínó með Pares Balta Blanc De Pacs

Víngarðurinn segir;

Blanc de Pacs frá vinum mínum í víngerðinni Parés Baltà hefur fengið nokkuð reglulegar smakkanir hjá Víngarðinum í gegnum tíðina (og reyndar mörgumsinnum áður en Víngarðurinn var opnaður almenningi) og hversu mjög sem mér þykir vænt um Joan Cusiné og fjölskylduna þá hef ég átt erfitt með að finna neistan sem kveikir í mér þegar ég smakka þetta vín. Til upprifjunar þá hafa árgangarnir 2012 og 2014 báðir fengið *** og það er því gleðiefni, finnst mér, að árgangurinn 2016 sé að mínu viti sá ferskasti og besti sem ég hef prófað.

Þetta hvítvín er lífrænt einsog flest sem frá Parés Balta kemur (sumt er meir að segja lífeflt, eða bíódýnamískt) og er blandað úr hinum hefðbundnu katalónsku þrúgum Parellada, Xarello og Macabeu (sem kallast líka Viura). Fjölskyldan talar reyndar sín á milli á Katalónsku sem er tungumál, skyldast hinu forna Occitane-máli sem talað var og er í Languecoc í Suður-Frakklandi, en það er önnur saga. Það hefur gylltan lit og rétt tæplega meðalopna angan af hunangi, sitrónum, olíukenndum steinefnum og appelsínublómum. Þetta er kunnuglegur ilmur og ef maður bætti við gerjunartónum þá væri þetta ansi nálægt hinu hefðbundna Cava-freyðivíni.

Í munni er það sýruríkt, létt og þurrt með einfaldan prófíl en hið ágætasta jafnvægi og keim sem minnir á sírónu, appelsínur, læm, hunang og olíukennd steinefni. Það er líka svolítið einsog kolsýrulaust Cava í munni en það má gjarnan vera um 8-9°C til að njóta sín sem best. Of mikið kælt verður það dálítið herpt og mónótónískt. Hafið með léttum forréttum, ljósu pasta og puttamat.

Verð kr. 1.999.- Góð kaup.

Share Post